اجازات ...... أهلا

الحمد لله الامتحانات خلصت و عدت بس يا رب النتيجة تبقى حلوة عشان متبقاش اجازة غم و هم عليا و على الشعب كله

البوست دا متأخر شوية اصل انا خلصت امتحانات من هنا و طرت على البحر و الشمس و الهوا :)


لازم الواحد يعيش الصيف بقى باذن الله راجع للمدونة قريبا

والله المدونيين كلهم وحشونى و متأسف فعلا انى مقصر فى حقهم

امتحانــــات ... أهلا

و بكل أسف و زى ما بيقولو الامتحانات بقت على الابواب

دا مش كدة بس دى فتحت الابواب و بتدور عليا

ربنا يستر بجد

امتحاناتى هتبدأ 26 / 5 / 2007 ان شاء الله

ادعولى بقى يا جماعة اعرف ازاكر كويس اولا

و ادعولى احل كويس فى الامتحانات

و ادعولى الدكاترة يبقو حنينين علينا

و اللجان تبقى حلوة ;)

و التيجة متظهرش خالص و ان ظهرت تبقى حلوة

معلش انا عارف انى طماع فى الادعية الكتير دى

بس ادعولى بقى

يا رب ... انجح

و مفيش مشكلة لو اجيب تقدير

و من جد وجد و من زرع حصد

و زاكر تنجح .. غش تجيب تقدير

تــــــــــاج تجتوج متجتج

دى اول مرة اجاوب على تاجات و هحاول بقى تكون اجاباتى نموذجية و مش هغش من حد و لا برشام و لا موبايل و لا

بتاع ...... فكرتونى بأيام الامتحانات الله لا يرجعها ايام سووودة الواحد بيبقى قاعد فى اللجنة زى البرص الجعان و مركب دش على راسه اى كلمة تعدى من فوقه يلقط على طول ... اياااااااااااااام

ما علينا من الامتحانات دلوقتى خلينا فى التاج اللى جاللى من ارتعاشات حياتيه

نخش بقى على المفيد و سيبك من البعيد يلا كله جاهز شد نفس و اكتمه و فيش الهوامش و انزل معايا ........ أصــــــلى

-------------------------------

تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها ..

تنفصل عن عالم الواقع دى بتفكرك لما الواحد بيتكيف و يعمله دماغ عالية زى الواد بلية و دماغه العالية كدة اديها بقى جوينتات على كام خابور شد شدتين على نفسين شيشة يا سلاام بس انفصلت عن عالم الواقع خلاص ..... هههههههههه بهزر يا جماعة محدش يصدق انا اعمل الحاجات دى بردة !! انا شاب محترم يعنى بانجو مثلا بس لكن حشيش لا استغفر الله و البامجو بيقولو حلال .. بيقولو المفتى حلل البانجو لانه محلى الصنع !!
هوا الكمبيوتر طبعا من و انا صغير و انا بموت فيه يعنى لما ببقى ادامه بنسى نفسى و انسى العالم و انسى كل حاجة بس فى الآونة الاخيرة ... حلوة " الآونة " دى ؟ مبقتش بحبه زى الاول زهقت منه يا بابا مش قادر اكمل لازم نتفترق

*-*-*-*-*-*-*-*-*-*-*-*-*-*-*-*

هل مقدار سعادتك أو شعورك ايا كان- عند تمرير التاج لك- يختلف حسب المدون الذي يمرر لك التاج ؟

هيا بتختلف مع ان دا اول تاج ليا بس اكيد بيبى فى معزة خاصة لمدون معين و مدون تانى بيبقى له خروف مثلا يعنى هيا بتختلف بس دا بيختلف مع مبدأ المساواة و ان كلنا سواسية و مع مبادئ الحرية و الديمقراطية و المهلبية و نظرية على هبالو ....... بس لا والله عادى اى تاج يجيبلى من اى مدون بفرح و ببقى مبسوط اى كان المدون

-*-*-*-*-*-*-*-*-*-*-*-*-*-*-*-*

هل ترى للتاج أهمية حقيقية ؟

طبعا ابصلوطلى التاج له فوايد كتير كدة زى السفر سمعت انهم بيقولو له سبع فوايد .. البهدلة و القرف و مش عارف الباقى التاج بقى زيه كدة له فوايد .... بجد له فوايد يعنى مثلا بيديك فرصة انك تبعبر عن نفسيتك و تفك كدة عن نفسك و تخرج شحنات منخزنة جواك يعنى انا أعتقد انه فكرة حلوة

*-*-*-*-*-*-*-*-*-*-*-*-*-*-*-*-*

هل فكرت في عمل تاج خاص لك من قبل؟

لا يا عم تاجات مين بيقولو بيقبضو على اللى بيعملو تاجات الايام دى و يودوهم سجن ابو غريب و احنا مش اد سجن ابو غريب يا كبير

..... بس يمكن عشان انا لسه مدون جديد و كدة و دا اول تاج ليا لكن باذن الله يبقى فى تاجات كتير و حاجات كدة

*-*-*-*-*-*-*-*-*-*-*-*-*-*-*-*-*

هل تفضل قراءة اجوبة التاج عند المدونين الاخرين؟ أم لا تهتم سوى بالتدوينات الأخرى فقط؟

اكيد طبعا بحب اقرا اجوبة تاجات الاخوة المدونين يلا اشطة عشان محدش يزعل موننا

*-*-*-*-*-*-*-*-*-*-*-*-*-*

عندما ترد على التاج ما الذي تراعيه اكثر؟

براعى بقر و جواميس و حاجات كدة ... يعنى ممكن نقول بحاول تكون الاجابات وافية و كافية و لا تشير بأى حال من الاحوال الى اى شئ من الاشياء و اى غرض من الاغراض و اى فعل من الافعال ..... فاهمنى طبعا !! ؟

*-*-*-*-*-*-*-*-*-*-*-*-*-

هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟

قطعا مو لما امرر لواحد تاج اكيد ببقى عايز اعرف اجاباته على التاج دا ولا ايه ؟ و هقتبس المثل الشعبى من ارتعاشات حياتيه

" قل لي ما تاجك .. اقول لك من انت "

*-*-*-*-*-*-*-*-*-*-*-*-

هل تلتزم حرفيا بأسئلة التاج ؟

ازاااى مينفعش دا يبقى تزوير فى اوراق رسمية و بيبقى مكتوب على كراسة الاجابة و لن يلتفت الى اى اجابات مش عارف ايه

اكيد شفتوها يعنى قبل كدة ؟ يعنى س سؤال يبقى الاجابة ج جواب بس

*-*-*-*-*-*-*-*-*-*-*-*-*-*-*-*

ما هي نوعية التاجات التي تفضلها؟

افضل تكون سكر زيادة منزوعة الدسم مع شوية نسكافيه بلاك و لو مفيش بلاك ممكن نسكافيه من غير لبن !! عادى

*-*-*-*-*-*-*-*-

هل كنت طالب شاطر فى المدرسة ؟

و ليه بس كدة الأسئلة اللى تكسف دى متخلو الطابق بعرور بقى ... انا لغاية 3 ابتدائى كنت شاطر و متفوق و طالب مثالى بعد كدة انجرفت مع التيار ... و ووقعنا بالطيارة !! بس محدش يفهمنى صح انا لسه شاطر بردة ... مش اوى يعنى

*-*-*-*-*-*-*-*-*-*-*-*-*

إيه أكتر مادة حبيتها في المدرسة والكلية؟

فى المدرسة كنت بحب الانجليزى و الالمانى اوى و فى الكلية بقى مش لاقى مواد احبها خالص

*-*-*-*-*-*-*-*-*-*-*

إيه أكتر مادة كرهتها في المدرسة والكلية؟

هيا بتختلف على فكرة اصل اللى بيزاكر بينجح و من جد و جد و من زرع حصد و كل سنة و انتو طيبين و كيلو البصل بكام ؟

*-*-*-*-*-*-*-*-*-*-

كنت عايز تطلع إيه وأنت صغنن؟

صغنن ايه بس انا عمرى ما كنت صغنن ... بس كنت عايز اطلع برج القاهرة بس لما كبرت الموضوع اتغير خالص طبعا تفكيرى اتغير و كدة و بقيت عايز اطلع الهرم

-*-*-*-*-*-*-*-*-*-*

اخيرا خلاص بــح بوجه شكر و تحية لـ ارتعاشات حياتيه لتمريره التاج ليا ... ربنا يخليك و يخليلك عيالك و يوقفلك ولاد الحلال فى طريقك و ميوقفكش فى ضيقة ابدا و يفكلك كل عقدة ... هات ربع جنيه بقى

يا رب مكنش تقلت عليكم

اللهم صلى على سيدنا محمد

اللهم صلى على سيدنا محمد و على آل سيدنا محمد كما صليت على سيدنا ابراهيم و على آل سيدنا ابراهيم انك حمـــيد مجـيــــد

و بارك على سيدنا محمد و على آل سيدنا محمد كما باركت على سيدنا ابراهيم و

على آل سيدنا ابراهيم انك حمــــيد مجـــيد

فداك أبى و أمى يا رسول الله

ازاى تبقى شاب غلس ؟؟؟؟؟

بص يا سيدي . . علشان تكون شاب غلس لازم تسمع الكلام اللي انا بقولة دا كويس .. ركز معايا

- قوووول نكتة جاااااامدة طحن و طويلة . . و ف النهاية - ف الحتة بتاع الافية - قول انا نسيتها .. و لو عايز قمة

الرخامة .. قول كنت عارفها بس نسيتها و كانت جااامدة اوي

..

- هات بخاخة مطهر"ديتول"و امشي ورا صاحبك .. كل ما يمسك حاجة .. قوم ترشها بالبخاخة علي طوووول

- طول مانتا قاعد قلد صوت الفاكس !!

- لو انتا ف مكروباص و اللي جنبك غفل و نام .. قلد صوت تلكس العربية..و قول :تييييييييييت..- لو رخم اوي و

مصحيش .. صحيه .. و لو نام تاني صحية تاني .. خليك وراة يا نجم!!

- و انت بتتكلم ف موضوع اسكت او اقطع كلامك - بس اعمل انطباع انك هتكمل-و ما.......بس خلاص

- لما حد يشتكيلك من حاجة اسمع منة كويس اوي اوي.. و بعد كدا قولة : انا عندي مشاكل اكتر من يا جدع..فكك مني

- ف المطعم بص لواحد و انتا ف ايدك اللقمة بصلة وقت طويل اوي..و قولة لما تحس انة بدأ يستغرب "ممكن الطحينة ثواني!!"

- لو انتا قاعد مع اصحابك بتتفرجوا ع التلفزيون و فصل الارسال و عمل التلفزيون صوت : وش ش ش ش ش ..علي الصوت اوي

- لو مفصلش..غير القناه قبل نهاية المتش او المسلس ب 5 دقايق- او ف حتة جااامدة-

- و انتا قاعد مع اصحابك صفر نشيد بلادي بلادي- كرر الحركة بعد 10 دقايق- كل ما حد يقول حاجة قولة:هاها..كل الناس فاكرة زيك كدا!!

- استلف قلم من صاحبك .. وحط طرفة ف بقك ... و اعمل نفسك بتفكر اوي ف حاجة و مندمج- وانتا قاعد تعضعض ف القلم!!

- اضحك لواحدة ف الشارع بصوت عالي و قولها:طب و انتي عاملة اية؟

- لو كنت بتتفرج مع اصحابك علي فيلم ف اوله..احرقة ف جملة واحدة!!- و هما بيتفرجوا و تيجي حتة

معينة..قلهم:انا مش قلتلكم!!

ف المترو امضغ اللبانة بصوت عالي و ادوش اللي جانبك- لو كان بيقرا جرنال اقرا معاه..و علي صوت اللبانة يا نجم

- لو واقف واحد متعرفوش جنبك بيعد فلوس .. ف نص الفلوس قولة رقم عشوائي

واخيرا احب اديكوا نصيحة مش عارف معناها..لما واحد يغلس عليك..قولة:-

ثبت علميا ان الانسان بيولد مش بيبيض

!! انا حاسس اني غلست عليكو

لغة شباب اليومين دول - جيل اخر زمن

حول اللغة السرية للشباب تعالوا (( نرمى ودانا فى حجرهم )) ونشوف بيقولوا اية ؟؟؟؟؟

يبدأ يوم الشباب عندما تتجمع (( العصابة )) يعنى الشلة كل (( مورنينج )) عند (( ناصية الرمش )) وهى عبارة عن مكان تتوافد إلية مجموعة من بنات النادى أو الجامعة معظمهم بنات (( إستبن )) يعنى غير أصحابهم الآساسيين وكل بنت لها المصطلح الخاص بها يعنى لو البنت حلوه يطلق عليها (( أوكشة )) (( فى الزيف )) يعنى فى الجون ولو لابسة جزمة كعب عالى (( ألآستوك بيتوك )) أوحتة (( شامبو )) يعنى ريحتها حلوة ومستحمية !!!

ولو البنت صغيرة يطلق عليها (( أووزى )) ولو كانت البنت الاجمل فى الشلة يطلق عليها (( النتفة )) أما لو كانت قبيحة الشكل تبقى (( صندل مقطوع أو ضاربها طبنجة )) ولو البنت تخينة تكون (( اتوبيس )) ولو كانت غير متناسقة القوام او الملامح تسمى (( سلعووه ))ولو كانت لعوباً يطلق عليها (( هشكة )) ولو كانت مرتبطة تبقى (( أوفسايد )) أو (( متشفرة)) والكارت بتاعها مع فلان !!!

ولو كانــت البنت سمـراء البشرة تسمى (( ضالمة من قارة افريقيا )) أو (( مزرقة )) ولو كانت بنت من مكان شعبى تسمــى(( بيئة ))....

وعندما ترفض البنت المعاكسة تقول لمن يعاكسها ( يا خفة .. اية التهزير دة ... روح لمامتك يا بيبى ))وممكن الحكاية تكون فى السليم وتقلب صحوبية وتقول للولد (( خلينا فى الفيوتشر )) ...ولو الولد زهق (( اتخنق )) من البنت أو العكس يقولها (( سمعينى بودعك )) أو (( حديها الدبلة )) ....وعندما تريد البنت معرفة رأى أصحابها فى (( البوى فريند )) بتاعها تعطية ميعاداً وتطلب من صديقاتها رأيهم بدون أن يعرف(( الموكوس )) الغلبان ....

خدوا بالكم يا شباب من المصطلحات اللى جاية دية للأهمية القصوى عندما تقول لها صديقتها انك(( تاكسى )) يعنى انت لافف وداير وبتاع بنات .. ولو قالت (( سكامونى )) يعنى جميل و أمور ...(( ملسكوبيتش )) يعنى بخيل ...

(( تس تس )) يعنى رزل وممل ... (( شامورتى )) يعنى خنييق ..(( توت فروت )) مظهرجى ... (( خفشاوى )) غير واضح وهايف ... (( شنيش )) يعنى لامؤخذة هفأ .. !!!

ولو الولد تعبان فى المذاكرة يعنى (( جايب جاز والشراب هوى ومتخرتق )) !!!وأكثر مصطلحات متداولة هذة الايام(( العب باشكا )) يعنى العب على المكشوف !!(( حطيت إيدى على البلف )) يعنى فهمت الموضوع !!!

(( أدعك الفانوس دلوقتى )) يعنى ممكن تمشى وترحل !!!(( أرحلك )) أخرجك من الشلة !!(( الجوند )) فلوس !!(( مكيش القفف )) معاه فلوس كتير !!(( يا صباح المظلات )) للمتقدمين للكليات العسكرية !!(( فهمـى )) يعنى نفض وكبر الجمجمة !!!(( أحلق )) طنش !!!(( انت حتزاولنى )) انت حتشتغلنى !!!

(( مهييس )) عامل دماغ وطاير قووى !!!(( يا صباح اللى بتغنى )) صباح الخير !!(( يا مساء الليل )) يعنى يا مساء الخير !!!(( فوكك )) سيبك من الموضوع دة !!!

(( أراك أمس )) يعنى مش عايز اشوفك تانى !!!(( أحنا عيال قادرة وكفأة .. ودكتوراة فى الحداقة )) يعنى احنا شباب 100 / 100 !!!(( كل معرفتى بيه .. هاى باى )) يعنى مش صاحبى قوى !!!(( شوليطى . موليطى )) يعنى مش معايا فلووس .. مفلس !!ومن مصطلحات الاغانى المنتشرة بكثرة هذة الايام الاتى :(( انا رايح ألعب مع روبى )) يعنى انا رايح الجيم !!!(( تعالوا نحصل ماريا )) تعالوا نلعب شوية !!(( انت بتقلد روبى ؟ )) يعنى بتخبى وبتدارى !!(( أنت كدة تعجب بوسى سمير )) يعنى انت حطيت النقط على الحرووف

ايه رأيكم يا شباب